الاغنيه : ياسيدي مالي على الحب سلطان

كلمات : بدر بن عبدالمحسن ...... الحان: محمد عبده

يا سيدي ما لي على الحب سلطان
انت الذي تامره بأمرك وتنهاه

كلٍ له اصحابٍ .. وربع ٍ .. وعدوان
ناسٍ تبي بعده وناسٍ تمناه

إلا أنت كل الخلق في حبك انسان
قلبه معك دايم صباحه وممساه

ياللي وسع صدرك لنا دار وأوطان
ياللي السخى والجود فعلك تعداه

مااقولها مدح ترى اللطف له شان
والعطف مثل الجود تحمد سجاياه

أنت البخيل بمنتك وقت الاحسان
وانت الذي لطفه يباري عطاياه

ما كل من فارق غدى مثل سلطان
كلٍ يبي شوفه .. وكلٍ ترجاه

لو المرض جيشٍ نطحناه بسنان
ولو الكدر بحرٍ شربناه لرضاه

أنا أحمد اللي بدّل الجهل بإيمان
اللي حمى عمي وصانه وشافاه

يا سيدي ما لي على الحب سلطان
انت الذي تامره بأمرك وتنهاه