الاغنيه :  حبيب الشعب

كلمات :  خلف بن هذال ......... الحان: محمد شفيق

من فيافي ديرتي جيت أحث الرجل جيت
ممتطي مطية ما تخالطها الوسوم
في شداد الراحلة كم سرحت وكم سريت
أطرد الأيام طرد النعام مع الحزوم
******
كم رضيت وكم زعلت، وزعلت وكم رضيت
طاوى بطني واسجم عن الوجبة وأصوم
وكم بكيت وكم ضحكت، وضحكت وكم بكيت
تقزر الدنيا بعض النواجذ فالبهوم
الزمان اللي كواني بناره واكتويت
ما حجبت الوجه بالقيظ عن لفح السموم
نصف قرن أشد ركب العزيمة ما انثنيت
والرجال لها مبادئ وفا ولها سلوم
******
الولد دون الوطن والمعيشة يستميت
ما يخلي الواجب اللي تخليه الرخوم
اقتلب وأدور الرزق وبحظي رضيت
واقتطع مناكب الأرض ما أسمع من يلوم
أطلب الخيرة ليا اخترت فرجة وانتويت
ما يرد المنتوي صوت ذيب وحس بوم
كان ما جاك الولد يجتلد لو حي ميت
من حساب اللي رمى فالمقابر من لحوم
******
عيب أردد ليت وانا ولد وأقول ليت
منوة من قبلنا ما قضت لحدن لزوم
غبت عن داري مغرب وعنها ما سليت
جيتها يوم الفرج لاح من روس الرجوم
والتحية يابو متعب وأنا بعمري فديت
يا حبيب الشعب وأبرك من الأيام يوم
يوم سقت القافية فيك والله ما غديت
مثل سوق القافلة للجدي بين النجوم
******
فيك بالقطب الشمالي بمسراي اهتديت
كل ما يممت يمك تعرفت اليموم
فيك يابن اليعربية وأنا منك ابتديت
رايم العليا ولا غير عبدالله يروم
الحظيظ أنا بخدمتك أنا، وأنا البخيت
يوم رافقتك حذفت المشاكل والهموم
المواقف غالية كم خذيت وكم عطيت
الحياة لها ضريبة وتتبعها رسوم
******
أشهد انك نخوة المجد للمجد انتخيت
نخوة ما تارد الا مواريد السهوم
وأشهد إنك في مسيرتك ولشعبك وفيت
منك واصلنا المسيرة وحققنا الحلوم
وأشهد أنك يوم خضت المناصب ثم وليت
كرسي التدبير بالفعل شتت الوهوم
وأشهد أنك صايب الرأي بأفكارك سعيت
للتآلف والتحالف وتسكيت الخصوم
******
في ميادين الديانات حاورت ومضيت
ومن يعارض في مساعيك جعله ما يقوم
ثور النايم وقله علامك ما صحيت
الأفاعي تدخل الناس من تحت الهدوم
ناس ما تدري عن اللي يدور وكيت كيت
خوض حوض ورجد خيل على الفارغ تعوم
المخاطر واردة وانت عنها قد دريت
كل طلعة شمس منها يبينن الثلوم
******
يا عمر في رحلتك ما هدمت إلا بنيت
ما تعرضت الكنيسة ولا روعت قوم
معدلك فاروق وأعظم أخطاك اللي خطيت
كل من ودعك مستقبلك عند القدوم
وأنت يا قايد وطنا مشينا ما مشيت
المثابر بالصبر والغنايم بالعزوم
أرفع الراية وسل السلاح ليا غزيت
للوطن قصرت أيادي ونزلت الخشوم
******
يستتب الأمن وليا اهتنى الشعب اهتنيت
يسهر القبطان واللي على المركب ينوم
شاهر سيف العدالة وللمصحف قريت
تنقذ المظلوم من تحت لحيان الظلوم
أنجبك صقر الجزيرة وفي حضنه ربيت
فيصلى مر كبده على كبده يزوم
حنكك حنكة بطل للمواجيب ارتكيت
من نصيبك يكبر القسم من بين القسوم
******
يا عريب الأصل والفصل للجوزا سميت
عن سلوك الغدر والشك والشرك امعصوم
بالمغارب والمشارق لك السمعة وصيت
جلجلت بالكون تحت السماء فوق الغيوم
يا بعيد الحوم يا للي على الرجم اعتليت
الطيور موقعة لا تطير ، ولا تحوم
شامخ الهامة حشا ما خضعت ولا انحنيت
يا صميدع من يعاندك مفلس ومهزوم
******
من تدخل في عقيدتك للحق اعتزيت
عزوة العوجا ولازال للعوجا قروم
سطوة الجبار في المعتدى لامن سطيت
ورحمة الغفار جاتك من الرب الرحوم
******
يا زعيم العرب للعرب بالنية صفيت
الزعامة يا زعيم العروبة لك تشوم
يا عزيز الجاه يا كثر ما صنت وحميت
من يذود بجانبك يرقد آمن ومخدوم
******
يا كثر ما أصلحت من حال وأحوال ورعيت
من مشاريع تخليك مكرم ومحشوم
السياسة يا سياسي بها بعت وشريت
وين يالسوام في سوقها محد يسوم
******
وأنت يا تاريخ سجل بعينك ما رأيت
زف عصر الملحمة يعلم العالم عموم
في ولي العهد ابمدح وللمدح اهتويت
راعي الفزعات ضافي الشمايل والكموم
******
مبتسم وقت الشدايد ويسعدك ان نصيت
في عيونه يصغرن الكبار من العلوم
في المهمة يا بوخالد على القمة رقيت
للدفاع مدافعي مستعد للهجوم
******
ردك الله بالسلامة ومن قلبي دعيت
مرتجي عودتك رجوى الصحارى للوسوم
والقصيدة تمت أبياتها خمسين بيت
والسموحة يا ملكنا عسى عزك يدوم